بمناسبة العودة للدراسة : تطبيقات أندرويد للدوافير

السلام عليكم ..

Illustration by Otto Steininger

أدري إن بعض الناس عندهم حساسية من طاري الدراسة ، وأدري إن الدراسة غير مرحب فيها خصوصاً إنها تجي على حساب الإجازة ، بس عاد الشكوى لله هذي هي الحياة :d .. شهرين لك و باقي السنة عليك

المهم ، أعتقد إننا ألحين في وقت صرنا نعتمد فيه بشكل كبير جداً على أجهزة الجوال والتابلت ، خصوصاً في أمور ( الإنجاز والإنتاجية والعمل ) ، والشركات المصنعة للبرامج والتطبيقات ماقصرت كل يوم مطلعة لنا تطبيق جديد ينافس التطبيقات الموجودة في السوق .

من هذا المنطلق ، قلت بجمع لكم مجموعة تطبيقات أندرويدية مفيدة ، إن شاء الله تفيدكم وتساعدكم على تحقيق نجاحات أكبر :) ،مع ملاحظة أن التطبيقات اللي اخترتها لكم مجانية ، أو على الأقل في منها نسخة لايت .

1. دروب بوكس ( Drop Box ) :

دروب بوكس خدمة سحابية كبيرة وقوية جداً ، تسوي تزامن بين الأجهزة بحيث إن الملفات المرفوعة على هالخدمة من أي جهاز تصير موجودة بشكل أوتوماتيكي على كل الأجهزة المسجلة . الخدمة رائعة جداً وساعدتني بشكل كبير في إنجاز أعمال كثيرة .

إذا كان تطبيق دروب بوكس موجود على جوالك و على جهاز الكمبيوتر ، تقدر توصل لأي ملف موجود على جهاز الكمبيوتر من خلال جوالك ؛ سواء كان ملف بي دي إف أو صورة أو مستند أو وت إيفير ، عن طريق وضع هذي المستندات اللي تبي توصل لها في مجلد معين موجود في جهاز الكمبيوتر حقك .

سهل جداً + مفيد جداً .

2. ستوديوس ( Studious ) :

تطبيق رهيب جداً ، التطبيق يوفر إمكانية تدوين الملاحظات ومواعيد المحاضرات و الهومووركات ومواعيد الاختبارات والزحمة هذي كلها ، يعني يفكك من سالفة التدوين على الدفاتر والأوراق .

من مميزات التطبيق إنك تقدر تضبطه بحيث إنه يحط الجوال على السايلنت بشكل تلقائي في أوقات المحاضرات ، و ممكن تحط تنبيهات على أوقات تسليم الهوموركات أو مواعيد الاختبارات ، إضافة إلى إمكانية حفظ الملاحظات والصور اللي لها علاقة بالمحاضرات .

3. كام سكانر ( CamScanner ) :

تطبيق بسيط لكن فكرته مفيدة جداً ، كل اللي عليك إنك تاخذ صورة لورقة قدامك و التطبيق بيحول هالصورة لملف بي دي إف ! وبعد كذا تقدر تستخدمها للطباعة أو للمشاركة . التطبيق يتيح لك اقتصاص الصور ، و حفظها بأكثر من صيغة . من تجربتي المستند الناتج ما يطلع بدقة كويسة ، لكن يفك أزمة ويختصر وقت .

4. قوقل درايف ( Google Drive ) :

إذا كنت تستخدم مستندات قوقل بكثرة ( Google docs ) فضروي يكون هالتطبيق موجود على جهازك الجوال أو التابلت ، من خلال هالتطبيق تقدر توصل لكل مستنداتك المرفوعة على قوقل درايف من أي مكان وتتشاركها مع غيرك .

5. جي تاسكس ( GTasks ) :

تطبيق قوائم مهام ( To do ) عادي تقريباً ، لكن الفرق إنك تقدر تسوي تزامن مع قوائم المهام الثانية على قوقل ، وتقدر تشاركها عن طريق الجي ميل و مستندات قوقل وغيرها . التطبيق مرتب وجميل ومرن .

6. هاندي كالك ( handyCalc )

التطبيق هذا عبارة عن عدة تطبيقات مجمّعة في تطبيق واحد ، آلة حاسبة - تطبيق رسم معادلات رياضية - تطبيق تحويلات . تقدر تدخل معادلات رياضية وتطلب من التطبيق يحلها لك ، أو يرسمها لك ، تقدر تحول عملات ، وحدات ، أوزان، أحجام ، مساحات ....إلخ .