السلام عليكم
أتوقع كثير وصلهم كلام الأخت سامية الشهري بخصوص قفزة فيليكس ، الأخت سامية شككت في القفزة لعدة أسباب وكثيرين اقتنعوا فيها ، لكل شخص وجهة نظره ، ما أبي أصادر وجهة نظر أي أحد سواء الأخت سامية أو اللي مقتنعين بالكلام هذا ، لكن حسيت الموضوع مثير للاهتمام وحبيت أطرح وجهة نظري في الموضوع دام البحث والكتابة في النت ببلاش :)
أول شيء نشوف كلام الأخت سامية :
1_ليش مايكون الرجل الي بالكبسولة وطارت هالمسافة كلها رجل آلي شلي يضمن لنا انه فيليكسخاصة انه لمافتح الباب وقفز ماجابوا صورة وجه مع العلم ان مركب كامرا ع صدرة و3 كاميرات اخرى بالبدلة وماصورت هالكامرات اي شيء لااثناء القفز ولاوجهه ولااي شيء ثاني2_لماوصل فيلكس للارض مالاحظتوا عدم وجود فريق طبي في استقبالة وكانهم متاكدين انه بخير ولايحتاج اي اجراءات طبية فقط المصورين الي كانوا بانتظارةوهذا شئ غريب لان حتى الي بينط من فوق ناطحة سحاب يكون الفريق الطبي بانتظارة احتياطابس فيلكس حتى دكتور واحد ماتواجد للكشف على قلبة اوتنفسة اواي شيء كالعادة4_ المظلة كانت نكته بحدذاتها وانه فتح المظلة قبل الوقت المحدد حركة متعمدة حتى لايكون كل شيء كامل فكان لابد من ان جزء من الخطة يفشل وكان اهونها الرقم القياسي للقفز الحر المظلة مظلة للهواة وليس للطيارين مما يعني انه قفز من ارتفاع بسيط فربما قفز من طائرة كانت تحلق بالقرب من اجهزة التصوير والمنطقة المتوقع هبوطة فيها وكنا نتابع ذلك الجسم الغير واضح المعالم وهو يخترق الاجواء وفجاءة ظهر لنافيليكس بالمظلة بصورة واضحه5_ ماقهرني الا الكاميرات اللي لابسها فوق 4 كاميرات ع اساس انها تصور القفزة من جميع الجهات وبزوايا مختلفة وينهي ماصورت شيء ماشفنا غير جسم غريب كانه كتلة ملتهبة من خلال تصوير بدائي غير منطقي6_ اثناء القفزة لم يكن هناك تصوير يوضح قفزته من خلال الاجواء الخارجية تصوير من تحت يبين لنا حقيقة مايحدثفيليكس مع احترامنا كنت متهور حينما ظننت اننا سنصدق هذة المهزلة وكنت متهور اكثر حينما وقفت ع قدميك فورا ياخي مثثثل عشان تمشي شويامريكا ذهب الزمن الذي تضحيكين فيه ع شعوبنا فقد كذبتي من قبل حينما ادعيتي ان رجالك وصلوا للقمر وبالتحليل والمنطق اكتشفنا كذبك وان روسيا فقط هي من وصلت إلى القمر ودارت حولة اما انتي فقد تم تصوير رجال الفضاء في صحراء تشبة القمر لكن فضحك العًلم الذي يرفرف ونسيتي ان القمر لايوجد بة هواء والظل لرجال الفضاء وكان منطقياان لايكون هناك ظل كماادعيتي الابوجود كشاف قوي يقف خلف التصوير
نرد حبة حبة :
أولاً : تسأل ليه ما جابوا صورة وجهه لما قفز : كلنا انتبهنا أنه قبل ما يقفز بدقايق نزّل غطا الخوذة المظلل ، فمافي أي فايدة من وضع الصورة على وجهه ، إضافة إلى أن الوقت مابين وقوفه على حافة المركبة وقفزه كان قصير جداً ، فما في مجال إنك تفوت اللقطة المهمة واللي هي سقوطه من فوق عشان تصور وجهه واللي ماراح يبين منه شيء بسبب التظليلة. بالنسبة للكاميرات اللي على البدلة ، صحيح وقت العرض المباشر ما عرضوا شيء من تسجيلها ، لكن بعده عرضوا مقاطع مختلفة مسجلة منها ، و هذا واحد منها .
ثانياً : ليش ما كان فيه فريق طبي بانتظاره على الأرض : الفريق الطبي حضر مباشرة بعد وصوله للأرض عن طريق الهيليكوبتر بمرافقة مندوب موسوعة جينيس اللي جاء يوثق السالفة ، وهالشيء مذكور نصاً في مدونة ريد بول . وأعتقد أن أول شخص نزل من الهيليكوبتر ونط عليه بعد المصور ( اللي كان لابس كاب أسود ) كان من الفريق الطبي .
ثالثاً : بخصوص الشيء اللي يشبه اللهب اللي كان حول البدلة وقت القفزة ، مالي خبرة كثيرة في التصوير ، لكن أعتقد أن تصوير جسم صغير ( جسم إنسان ) يتحرك بسرعة كبيرة جداً من مسافة بعيدة مو سهل أبداً ، لذلك ما كان الجسم واضح وقت سقوطه فظهر هذا الشيء الشبيه باللهب حول البدلة . أما سالفة نظافة البدلة فما أشوف فيها مشكلة ، صح إني ما قد طبيت من ارتفاع 120 ألف قدم بس ما جاء على بالي شيء عالق في الهواء ممكن يوسخ الأشياء اللي تطيح :)
رابعاً : سالفة الباراشوت أو المظلة ، فيه أكثر من تفسير لفتح الباراشوت بدري ، منها أن فيليكس كان يعاني من مشكلة البخار اللي على الخوذة واللي ماكان يشوف بسببه كويس ، فما كان يعرف قد إيش باقيله على الأرض ، و منها أن سرعة سقوطه كانت أعلى بكثير من سرعة سقوط جو كيتينقر ( صاحب الرقم القياسي السابق ) بسبب فرق الارتفاع ، بالتالي الفترة الزمنية اللي احتاجها فيليكس للوصول للأرض أقصر من الفترة الزمنية اللي احتاجها جو ، بالتالي كان لازم يفتح البارشوات في وقت أقصر . أما قضية تغير دقة التصوير بشكل مفاجئ فتبريرها سهل : كان بعيد فكانوا يستخدمون أجهزة مخصصة لتصوير الأجسام البعيدة واللي تكلمت عنها في النقطة السابقة ، وفجأة صار قريب وصارت سرعته أبطأ بسبب الباراشوت فما عاد يحتاجون هالأجهزة واستبدلوها بأجهزة وضوحها أعلى .
للمهتمين بالفيزياء : مقال يشرح سبب قصر وقت وصول فيليكس للأرض
النقطة الخامسة الرد عليها في النقطتين الأولى والثالثة .
النقطة السادسة مافهمت المقصود منها ، لكن إذا كان قصدها ليش ماكان فيه تسجيلات مختلفة للقفزة فما أتوقع فيه أماكن كثير يقدرون يثبتون الكاميرات عليها ، المركبة كان عليها كاميرات داخلية وخارجية وشفنا تصوير منها وقت العرض المباشر ، والبدلة كان عليها كاميرات وشفنا تسجيلها بعد العرض المباشر على مواقع الفيديو ، و المكان اللي انطلقت منه المركبة على الأرض فيه كاميرات وشفنا تصوير منها وقت انطلاق المركبة و خلال السقوط ، والهيليكوبتر كان فيها كاميرات و شفنا منها لقطات وقت وصوله للأرض . ما أعتقد فيه أماكن إضافية ممكن يحطون كاميراتهم عليها .
أما النقطة الأخيرة وهي نقطة إنه كيف وقف على رجوله أول ما وصل ، فتفسيرها في البدلة ،مئات الآلاف اندفعت في تصميم وتجربة وصناعة البدلة ، ومع وجود كل أنواع التطور العلمي والصناعي ، فهل من المفروض إن البدلة تسبب مشاكل للي يلبسها ؟ إضافة إلى أن الرجّال _أقصد فيليكس _ رياضي و متدرب على السالفة وقفز مرات كثيرة من مسافات عالية قريبة من المسافة اللي قفزها ، فجسمه متعود جداً على هالموضوع.
فيه جانب ثاني للنقطة هذي ، وهو إنه في كثير شككوا بخطورة القفزة _وأنا أأيدهم في هالشيء، يعني صحيح صعبة وخطيرة لكن مو للدرجة اللي روّجت لها الشركة ، بدافع تكبير الموضوع وجذب انتباه العالم ( وأكيد هالشيء يشكل في النهاية دعاية قوية جداً للشركة ) ، بس تخيلوا أن الموضوع فعلاً خطير وفيه احتمال أن دمه يغلي ويموت أو أن البدلة تحترق وقت سقوطه ، هل تتوقعون إن الشركة ممكن تغامر بسمعتها بالطريقة هذي ؟ ما أقول إنه مافي خطورة ، فيه أكيد لكن مو بالمقدار اللي حسسونا فيه .
وبس هذا اللي عندي .. طبعاً أرجع وأقول كلامي هذا مجرد رأي اجتهدت فيه يحتمل الخطأ والصواب ، إذا أعجبك كلامي كويس ، إذا ما عجبك سوّ نفسك ما قريت شيء .
إيه صح :
بقلم وعد النجاشي :d
مصادر استعنت فيها:
كلام مقنع وجميل
ردحذفوالمدونة اجمل واروع وتعرفت عليها عن طريق بحثي عن مقال الكاتبة: سامية الشهري ودخلت هنا بالمصادفة واقتنعت بكلامك واعجبت بمدونتك
مممره ردك مقنع، الصراحه كان ودي أرد على ناس وأقولهم على كلامهم او شكهم الغير
ردحذفمقنع واللي ماله داعي ،يعني واحد ويبغى يحقق رقم قياسي وش مشكلتكم معه ،
ما أدري منقهرين ولا محترين منه ...من جد بعضهم معقدين بطريقة غير معقولة !
بس إنتي الصراحة كفيتي ووفيتي ...وممره تعجبني مدونتك مع شخصية فآهي : ))