ليش يلاحقك الدخان إذا جلست عند النار ؟

السلام عليكم

سؤال كان يحيرني من زمان ، ليش إذا شبّيت الضو ( شبيت الضو = ولعت النار ) وجلست عنده فجأة تبدأ النار تدخن باتجاهي ، وإذا غيرت مكاني لحقني الدخان ؟ أروح يمين يروح يمين ، وأروح يسير يروح يسار .. استهبال ×_×

الناس يقولون ( الدخان يلحق الزين ) ، حتى الأجانب تفاجأت لما بحثت عن الموضوع إنهم عندهم نفس الفكرة ( smoke follows beauty ) ، تفسير منطقي صراحة هههههه بس عاد لازم يصير فيه تفسير علمي للشغلة .

يقولك : النار بطبيعة الحال محاطة من كل الجوانب بالهواء ، فلما تجي أنت و تجلس مقابل نار فإنك تحجب الهواء عن النار من إحدى الجهات . النار راح تحرق الأوكسجين المتبقي في المساحة اللي بينك وبينها بسرعة ، وبالتالي راح يتكون عندك مساحة صغيرة من "الفراغ" ، نوصل للجزئية المهمة : الدخان الناتج من النار راح يتوجه بشكل تلقائي للفراغ هذا عشان يعبيه ، بالتالي وين ما تروح راح يتكوّن هالفراغ وراح يلحقك الدخان .

لحل المشكلة يقولون لك ولع النار جنب جسم غير قابل للاشتعال وحجمه أكبر منك ، يعني مثلاً صخرة كبيرة أو طعس أو أي شيء ، لأن الجسم الكبير هذا راح يكوّن فراغ أكبر من اللي يكونه جسمك ، بالتالي راح يتجه الدخان للفراغ الأكبر .

وبس ، أتمنى لكم شتاءً ممتعاً ، و يعطيني العافية :)

المصادر :

http://www.campfish.net/campfire-smoke.php

http://gomestic.com/cooking/campfire-smoke-stalking-you/#ixzz2GWIAv2w5